تحذير لكل مصري خارج مصر - لا تسمع و لا تشاهد هذه الأغنية

آه يا ليل ... بقلمى

آه يا ليل يا ابو السهارى

يعشقوك كل الحيارى

يسرحوا بين النجوم

و القمر يمحى الوجوم

ده حبيب يشكى الفراق

و السهر و الاشتياق

ده حبيب قاعد ف نار

يشكى طول الانتظار

طب يا ليل هابعت جواب

ل حبيبى اللى غاب

بلغه منى السلام

قبل ما يضيع الكلام

قوله انى كتير هويته

و انى عمرى ما يوم نسيته

صورته محفوره ف خيالى

مشيته على طول ف بالى

صوته لحن بنام عليه

همسته و لمسة إيديه

يا حبيبى ف انتظارك

يا اللى حضنى هو دارك

نفسى اغمض عين و افتح

ألقى طيفك ورد فتح

لما ترجع بين إيديا

كل صعب يهون عليا

أنسى بعدك و الفراق

و انسى نار الاشتياق

امسك جاسوس ... بقلمى

امسك جاسوس احبس جاسوس

كل همه ع الفلوس

ع الكرامه كمان يدوس

..................

الجاسوس طبعه خسيس

بايع الغالى برخيص

عمره يوم ما كان حسيس

...............

فاكر إنه ف السما طاير كمان

ينقل الأخبار يخون الألعوبان

يصحى فجأه يلقى نفسه راح ف كان

...............

الجاسوس كل همه الدولار

نفسه يبقى شيك و يشرب السيجار

للوطن و لأهله مافى اعتبار

...................

شخص خاين للأمانه و بجداره

يمشى بين الناس و يدخل اى حاره

ناسى انه ف يوم هيشرب م المراره

......................

الجاسوس يعنى عميل

للعدو دايما يميل

للوطن على طول يكيل

................

امسك جاسوس احبس جاسوس

كل همه ع الفلوس

هو أقرب للتيوس

يا مصر رغم البهدله ..!!

يا مصر رغم البهدله...

والعكننه...

عاشقك أنا...

واعشق ترابك والنبى ..

عشقك مرادى ومطلبى ...

يام الرجال المشهورين ...

بالجدعنه ...

لما بكون ...

فى عز ضيقى ...

واشعر بإنى حتخنق ...

والقانى موش شايف طريقى ....

والدم منى بيتحرق...

اطلع على روض الفرج...

ألقى الفرج...

لماامشى حبه جنب نيلك...

احكى له همى ....

واشتكى لك...

عينى تشوف ...

بياع دره...

رجل عجوز...

واقف بهوى فحمته ...

بسمته...

لحظه ما فارقت سحنته...

يا عجوز ...

إدينى كوز ...

القاه بيضحك...

مزعلش منى واداها بوز...

من فين يا جد...

سوهاج يا وِلْدْ ....

من ييجى ستين سنه...

جينا هنا...

ويا ابويا الله يرحمه...

عمك رجب...

كان فى المعمار...

واما تَعَب...

والزمن جار...

مالقيش غير الشط...

ساب كل الدنيا...

إهنانا وحط...

فى الأول جاب ...

كوزين دره....

كلناهم هو وانا...

يا وِلْدْ ما تقول بالهنا...

بعديها صارت شغلته ...

بياع دره....

والعبد لله ورث ...

من والده حبه لشغلته...

شوى الدره...

طيب يا جِدْ...

امتى تعاود...

مانيش معاود...

الكوز بربع ..

خلليك مهاود...

يضحك فى وشى ...

الكوز بنص..

دا كان زمان الكوز بقرش...

دلوقت يابنى معادش قرش....

والقرش كان....

كالحوت وقرش...

القرش كنه عشرين جنيه...

بالذمه قل لى...

لحلوح جنابك...

ع يجيب لك ايه...

ان كنت فاضى...

اقعد قصادى...

احكى لجنابك..

تسعين حكايه...

والسهره تحلى ...

جنبك يا نيل...

ويا الحكاوى..

وسط الغناوى...

والشاى صعيدى...

سيدى يا سيدى...

ع الفحم يابا..

ويا الغلابه...

جنبك يا نيل...

بنت بضفيره...

الوش باسم...

الجسم ناحل..

الاسم هانم...

السن عشره...

لكن كبيره...

بتبيعى ايه...

ردت بخفه...

طب مانت شايف...

فى ايدى ايه...

ياللا يا سيدى...

سفتحنى سفتح...

الهى تربح...

يارب تنجح...

أنجح فى ايه...

فى اى حاجه ...

فى كل حاجه...

ربى مايحكم عليك بحاجه...

لا تجوع فى ليله...

او تيجى ليله...

ابنك يا سيدى...

يصبح عليل....

ياللا اشترى...

كيس المناديل ...

الله عليكم يا طيبين ....

فى الفقر حتى مبسوطين...

بس احكى ايه...

ولا اكتب ايه...

سفروت معدى...

قدامى هَدّى...

بالبسمه حلوه..

تمسح يا بيه...




يا مصر رغم البهدله...

والعكننه ...

عاشقك أنا..

لو مره تمشى ...

فى الدرب الاحمر...

يا مصر دايما...

كان دربك احمر...

حتى علمنا...

فيه تلت احمر...

واحلف بربى ...

ماشفت أحمر...

من شخص جاحد...

او شخص حاقد...

ييجى يقوللى ..

ايه يعنى مصر...

أدخل فى مره المغربلين...

أو خش زور سيدنا الحسين...

اتوضى واركع ...

ركعتين...

انظر وشوف من غير كلام...

وسط الالوف تحيا بسلام...

سيدنا الحسين...

يابن الامام...

يا مصر فيكى ...

ام الغلام...

والطاهره زينب...

ست ام هاشم...

يام العواجز...

كل اللى جالك...

بالحب ناجز...

يا مصر حبك...

امن وسكينه...

ستى نفيسه...

ستى سكينه...

جنب الامام...

ليثى وشافعى ...

يارب منك...

ضرى ونفعى...

سيد يا بدوى...

قائد وفارس...

عباس يا مرسى...

للشط حارس...

يخطفنى شوقى...

عمرى ما أنسى ...

سيدى الدسوقى...

يا قلبى غاوى...

تسمع حكاوى...

سيدى القناوى...

يا مصر دايما...

فى العالى شانك..

ياللى التاريخ عمره ماشانك...

والله ابيع عمرى عشانك...

واتمنى اشوفك فى الهنا...

يا مصر رغم البهدله...

والعكننه...

عاشقك أنا....

منقول مما راق لى

بلد العجايب ... بقلمى

بلد غريبه عجيبه
حكومتها تفرض ضريبه

شعبها شاعر بغيبه
و سرقه فيها و نهيبه

كل اللى فيها دمار
و جشاعة التجار

حتى الضمير إنهار
و الغش أصبح شعار

الحق فيها غريب
و الظلم فيها عجيب

آه يا بلد العجايب
وليد بيشتم ف شايب

حرامى سارق و نايب
شريف بيشقى ماجايب

العلم فيكى مهاجر
الجهل فيكى متاجر

الشهره دايما لفاجر
و اللامبالاه حناجر

طب إمتى أحس بكرامتى ؟
و احس إنك ك مامتى؟

ده انتى ف قلبى سكنتى
و جوه عينى أقامتى

آه يا بلد .... بقلمى

حبيتك صحيح يا بلد

حب الأم للولد

رغم كل الآهات

و الشوق للذكريات

لسه بحبك يا بلد

حب الأم للولد

خيرك كتير موجود

لكن ف ايد حقود

بيوزع فيه براحته

ما يهمه غير مصلحته

امتى يفوق شعبنا

على حلم من حقنا

يطرد كل الديابه

و يفرح الغلابه

الظلم فيكى أصيل

و العدل فيكى عويل

و برغم كل اللى فيكى

لسه باحن إليكى

طيب ممكن سؤال؟

امتى يروق الحال ؟

لازم النفوس تصفى

لاجل القلوب تدفى

علم و عمل و عباده

مع شوية إراده

وصفه سهله و بسيطه

نبقى على الخريطه

إيدك ف إيدى يا مصرى

تصبح بلدنا عصرى

و الحلم يصبح حقيقه

و هى دى الطريقه

لازم نعلى الصوت

و نبطل السكوت

زهقنا من الكلام

ما بيفيد الملام

العمل واجب علينا

علشان نفرح عينينا

و الأمل موجود

لنهاية الوجود

إنتخابات ! ....... بقلمى

بيقولك إنتخابات
و كلها تفهات
نايب مالوهش لازمه
داخل ف إيده جزمه
نايب ناجح أونطه
راشش كتير م الشنطه
نايب نايم همام
فاكر نفسه تمام
نايب يأزز لب
و عامل فيها ضب
و يقولك إنتخابات
يا عمنا سلامات

سألت ع الشفافيه
معناها إيه يا عنيا؟
كلمه قالوها كتير
و هتمنع التزوير
أتارى الكلمه ديه
من القاموس ملغيه
لما سألت عليها
قعدوا يلفوا عليا
و يقولك إنتخابات
يا عمنا سلامات

قالوا انت راجل حر
عبر و من غير شر
يلا انتخب يا مواطن
صوت ف العلن مش باطن
صدقتهم يا مان
و جريت على اللجان
لاقيت عساكر أمن
عقلى خلاص اتجن
و يقولك إنتخابات
يا عمنا سلامات

صناديق و مالهاش حصر
متقفله من العصر
قال عندنا دستور
من العيوب مستور
رجعت للدستور
أشوف فيه إيه يا حضور
لاقيت مواد عجيبه
و كلها معيبه
طب نظره للدستور
و كل شيئ بالدور
و يقولك إنتخابات
يا عمنا سلامات

قلت أمشى ف الشوارع
و أمثل إنى بارع
بصيت يمين و شمال
يفط كتير و جمال
زحمه يا خلق هوه
كل مرشح شوفوا
اللى يوزع لحمه
و اللى بيدفع رحمه
صوتك بكام يا عم ؟
و انا هانشلك م الغم
و يقولك إنتخابات
يا عمنا سلامات