إنتخابات ! ....... بقلمى

بيقولك إنتخابات
و كلها تفهات
نايب مالوهش لازمه
داخل ف إيده جزمه
نايب ناجح أونطه
راشش كتير م الشنطه
نايب نايم همام
فاكر نفسه تمام
نايب يأزز لب
و عامل فيها ضب
و يقولك إنتخابات
يا عمنا سلامات

سألت ع الشفافيه
معناها إيه يا عنيا؟
كلمه قالوها كتير
و هتمنع التزوير
أتارى الكلمه ديه
من القاموس ملغيه
لما سألت عليها
قعدوا يلفوا عليا
و يقولك إنتخابات
يا عمنا سلامات

قالوا انت راجل حر
عبر و من غير شر
يلا انتخب يا مواطن
صوت ف العلن مش باطن
صدقتهم يا مان
و جريت على اللجان
لاقيت عساكر أمن
عقلى خلاص اتجن
و يقولك إنتخابات
يا عمنا سلامات

صناديق و مالهاش حصر
متقفله من العصر
قال عندنا دستور
من العيوب مستور
رجعت للدستور
أشوف فيه إيه يا حضور
لاقيت مواد عجيبه
و كلها معيبه
طب نظره للدستور
و كل شيئ بالدور
و يقولك إنتخابات
يا عمنا سلامات

قلت أمشى ف الشوارع
و أمثل إنى بارع
بصيت يمين و شمال
يفط كتير و جمال
زحمه يا خلق هوه
كل مرشح شوفوا
اللى يوزع لحمه
و اللى بيدفع رحمه
صوتك بكام يا عم ؟
و انا هانشلك م الغم
و يقولك إنتخابات
يا عمنا سلامات

فين الأخلاق ؟ ..... بقلمى

يا ناس بادور ع الأخلاق
لو لسه ليها وجود قولوا
كل اللى شايفه أصله نفاق
والصدق يبطل مفعوله
الرشوه ظاهره و علنيه
أما الأمانه بكام ديه ؟
عشان أخلص مصلحتى
لازم أرش النقديه
كل المصالح حكوميه
و الواسطه فيها أساسيه
تعرف فلان ؟ طبعا آه يا مان
ماتعرفوش جاى ليه يا غلبان ؟
يعدى يوم أسبوع شهرين
و انا مش لاقيك يا عم حسين
طب حد تانى معاه الختم ؟
ده نسخه واحده و من غير شتم
حسين ده راجل قلبه نضيف
على طول بيجرى ورا الرغيف
و لما يرجع عم حسين
يقولوا يا ابنى ورقك فين؟
اتارى ورقى خلاص اتنسى
و اللى فاضل لى منه القسى
شكيت كتير و لا حد بيسمع
مش فيه قانون؟ لا يا عم ارجع
لاقيت كتير على نفس الحال
و كل واحد ما معاه مال
يا مسئولين دلونا يا هوه
ايه العمل ف اللى رأيتوه ؟

أحلام عاشق ... بقلمى

الليل بيسأل عليكى
مشتاق لنظرة عينيكى

و النجوم سهرانه
بتفكر و حيرانه

و القمر زعلان
بيقاسى م الحرمان

يا هل ترى بتتقلى
و لا بتتبدلى

لو تقل يبقى دلال
و عشقك كان محال

حبك أصبح حقيقه
بالثانيه و بالدقيقه

و طلعت ع المكان
ثاير كما البركان

ابحث و أدور عليكى
جايز ألمح عينيكى

و ف وسط يأسى و ظنونى
طيفك خطف عيونى

حسيت بلمسة إيديكى
تسبقها نظرة عينيكى

و سمعت ضحكه بريئه
و عرفت كل الحقيقه

الحب مش أوهام
الحب مش أحلام

الحب ده إحساس
يوصل لكل الناس

بحبها بجنون
و حبى مالى الكون

شاهد عليا الزمان
نفسى نعيش ف أمان

نفرح سوا بغلمان
يملوا علينا المكان

سؤال ؟ .... بقلمى

سؤال ؟

سؤال محيرنى
حبيبى ليه هجرنى

كنت ليه شمعه
و لغيره مش سامعه

وعده و صدقته
ليله و سهرته

يا حبيبى حبيتك
و برمشى غطيتك

مش عاوزه انا أبكى
طيب لمين هاشكى

هاشكيك أنا لربى
قادر يشيل كربى

وحده عالم بيا
و بكل ما فيا

ذنبى إنى حبيتك
و صنت لك بيتك

الذنب مش ذنبى
انت اللى مش جمبى

دايما كده سارح
ف أمس و امبارح

الدنيا دوامه
و النفس لوامه

ألوم أنا نفسى
و لا ألوم قلبى

يمكن يكون عقلى
هو اللى هيألى

خدع و صور لى
إنك مناسب لى

الدنيا دواره
مكسب مع خساره

فاهم بيتعلم
تعبان بيتألم

خلاص و مش ندمانه
بالعكس فرحانه

بعد اللى أنا شوفته
منك و قاسيته
أكيد أنا كسبانه

جحا - العاشرة مساء - هشام الجخ

الرقابه الدوليه على الإنتخابات ...

جدل واسع يدور هذه الأيام حول الرقابة الدوليه على الإنتخابات بين مؤيد و معارض و شد و جذب بين النظام المصرى المتمثل فى وزارة الخارجيه و الضغط الأمريكى 

ما معنى رقابه دوليه للإنتخابات ؟

أعتقد أنه متابعه دقيقه لكل تفاصيل العمليه الإنتخابيه لضمان نزاهتها 
فدور الرقابه يتمثل فى متابعة التغطيه الإعلاميه و ضمان تكافؤ الفرص بين المرشحين فى الظهور الإعلامى و عرض برامجهم الإنتخابيه 
و ضمان حق كل ناخب فى الإدلاء بصوته بحريه تامه و دون ضغط يمارس عليه من أى جانب و تنقية قوائم الناخبين و تسجيلهم فى القوائم و معرفة لجان تصويتهم 
و مراقبة عملية التصويت و رصد جميع مراحلها و مراقبة صناديق الإنتخاب و ضمان عدم التلاعب فيها بأى شكل من أشكال التزوير 

من هم أعضاء الرقابه الدوليه ؟
و إلى أى جهة ينتمون ؟

هم عباره عن مجموعة من المنظمات الأهليه و منظمات حقوق الإنسان و منظمات تابعه للأمم المتحده و مجلس الأمن و بعض الجهات الإعلاميه الدوليه المهتمه بالشئون السياسيه و كلها من جنسيات مختلفه و من دول متعدده


وجهة نظر المعارضين للرقابة الدوليه:

تتلخص فى عباره واحده يتم ترديدها و استخدامها كفزاعه للشعب ( التدخل فى شئون البلاد الداخليه )
أين هو هذا التدخل ؟  لا  أعلم 
معظم معارضى وجود رقابه دوليه إن لم يكن كلهم ينتمون الى النظام و يريدون حمايته و يخافون من كشف أمره و كشف طرق التزوير و التلاعب فى جميع مراحل العمليه الإنتخابيه فجميعهم أصحاب مصالح مع النظام و منهم من ينتمى إلى قوى المعارضه و لكن معارضه شكليه فقط و مرتبط بمصالح مع النظام فهو حريص على البقاء على النظام و الاستفاده من عقد الصفقات معه و لا يهمه المصلحه العامه و ما أكثرهم

لماذا اللجوء الى الرقابه الدوليه ؟


نظرا لعدم وجود نزاهه او شفافيه او مصداقية لدى النظام فى ان تكون الإنتخابات حره و نزيهه و نظرا لممارسات النظام فى كافة الإنتخابات السابقه من تزوير و تلاعب فى مجمل العمليات الإنتخابيه و نظرا لفقد المواطن و القوى السياسه للثقه فى النظام أرى أنه لابد من وجود الرقابه الدوليه


اذا كان النظام يريد انتخابات حره و نزيهه و خاليه من التزوير على حد زعمه و طالما أن كل شيئ سيتم بطريقه صحيحه بنزاهه و حياديه فلماذا الخوف من وجود الرقابه الدوليه ؟


معنى أنك تخاف من وجود تلك الرقابه دليل واضح على نواياك المستتره فى التزوير و عدم النزاهه 


كل الدول التى بها ديمقراطيه حقيقيه لا ترفض وجود رقابة دوليه على الإنتخابات كأمريكا و الدول الأوروبيه و لا يقولون أن هذا تدخلا فى شئونهم 
لماذا نقول نحن ذلك ؟


النظام يريد تحقيق معادله صعبه للغايه
يريد إضفاء الشرعيه على تواجده بالإنتخابات و فى نفس الوقت يريد ضمان فوزه عن طريق التزوير و التلاعب


لا أعتقد أن اى ضغط خارجى أمريكى يضمن نزاهة الإنتخابات 


السبيل الوحيد لضمان تلك النزاهه هو تدخل الشعب و ضغطه على النظام و خروجه من صمته الرهيب و تكاتفه للحصول على كافة حقوقه المسلوبه منذ عقود


لا ننتظر المساعده من أمريكا أو غيرها 
فكل دوله لها مصالحها مع النظام و تنظر الى مصالحها أولا  بغض النظر عن مصلحة الشعوب 

زمن الفن الجميل ...

مش عارف إيه اللى خلانى أتكلم فى الموضوع ده>>>>>>زمن الفن جميل !
 جايز لأنى كنت باسمع نجاة الصغيره و سرحت معاها شويه و رجعت بالذاكره لأيام زمان و خطر فى بالى أم كلثوم و عبد الحليم حافظ و ورده و مياده و عبد الوهاب و فريد الأطرش و فيروز
فعلا الواحد بيحن للطرب الأصيل كل حاجه كانت بتتعمل صح زى الكتاب ما بيقول كلمات صح .. ألحان صح .. أصوات صح الصح كان فيه إهتمام بأدق تفاصيل الأغنيه عشان كده أغانيهم لسه عايشه و باقيه لحد دلوقتى على الرغم من رحيل أغلبهم تحس إنهم بيقدموا رساله مفادها الإرتقاء بالذوق العام للشعب و التعبير عن الأحلام و الآمال بصوره فنيه غاية فى الروعه و الإبداع
لا توجد مقارنه بين ما يوجد على الساحه الآن و ما كان موجودا فى زمن الفن الجميل على الرغم من وجود بعض الأصوات التى تمتلك الموهبه إلا أنهم قلة قليله . يقع اللوم على الإعلام فى هذه النقطه بالتحديد حيث يروج للفن الهابط و يتجاهل الفن الأصيل يقولون إذا لم تعجبك المحطه غيرها !و هذا تهرب من المسئوليه 
الهدف من الإعلام التوعيه و الإرتقاء بالذوق العام و ليس الهدف ماديا دون النظر للأخلاقيات 


رحم الله زمن الفن الجميل

بحبك يا مصر ... من كلماتى

يا مصر انا قلبى عاشقك

نيلك شمسك و قمرك

يا مصر بحن ليكى

و اشتاق لنور عينيكى

يا مصر انتى الحنان

محتاج حضنك كمان

نفسى ارجعلك أوام

و ابعد عن الخصام

يا أغلى من حياتى

أوهبلك كل ذاتى

حبك ساكن فؤادى

يا أغلى من ولادى

نقسى عليكى تسامحى

نخاصم و انتى تصالحى

ألاقى زيك فين

زيك مافيه بلدين

تعليقا على خطاب الرئيس 10 نوفمبر 2010

قرأت كلمة الرئيس مبارك أمام الحزب الوطنى بخصوص الإنتخابات بتاريخ الأربعاء 10 نوفمبر 2010

كل ما جاء فى كلمة الرئيس كلام راائع بس يا خساره على الورق و بس 
شبعنا وعود من 30 سنه و نفس الكلام و نفس الوعود و النتيجه صفر كبير على أرض الواقع
و على رأى المثل ( أسمع كلامك أصدقك أشوف أمورك أستعجب ! )
المتابع لما وصلت إليه أمور المواطن البسيط من معاناه فى مختلف الخدمات و أزمات متعدده و متلاحقه و طوابير فى أبسط الأمور يتعجب من تصريحات الرئيس و كأن الرئيس يحكم دوله أخرى أو شعب آخر .
فقد وصلت المعاناه إلى حد خطير جدا حيث أنها طالت قوت يوم المواطن . فأصبح المواطن يقضى معظم وقته فى الطوابير ( العيش - الأنابيب- المصالح الحكوميه - حتى الحصول على كيلو طماطم أصبح بالطوابير !!! )

و انشغل المواطن بالبحث عن لقمة العيش و كيف يسد رمق أسرته و إبتعد عن الأمور الهامه التى تخص إدارة البلاد سواء بالإنتخابات أو سن القوانين و التشريعات أو القضايا التى تمس البلد على الصعيد السياسى 

إما أن يكون الرئيس لا يعلم ما يدور فى الشارع إلا من خلال التقارير التى يرفعها الوزراء و المسئولون و كلها مضلله و تلك مصيبه.
أو أنه يعلم ذلك و تلك مصيبة أكبر .
 المثير للسخريه و المضحك هو وجود بعض من هتيفة النظام و يحملون شعار الحزب فى الفتره المقبله بعنوان ( عشان تتطمن على مستقبل ولادك )  !!

مش كفايه مستقبلى اللى راااااح ؟ كمان لسه عاوزين تكملوا على مستقبل ولادى ؟ >>>> صحيح اللى إختشوا ماتوا
يقع اللوم على الشعب الصامت عن أبسط حقوقه فأنتشر الفساد و وصلت الأمور إلى درجه لا يمكن تعديل مسارهابسهوله و لا أدرى إلى متى سيظل الشعب صامتا ؟؟؟

بحبك يا ريس ..! كلماتى

بحبك يا ريس .. !

  بحبك يا ريس و أقولها بسذاجه
بحبك يا ريس بدون أى حاجه
بحبك و حبك معلم عليا
بإيد أمن رايحه و إيد أمن جايه
بحبك لأنك واخدها ببساطه
وحزبك يا ريس عايشها بألاطه
و شعبك يا ريس عايش ع البلاطه
و إيه يعنى لما يموت الغلابه
ف مركب مهاجره لتجار ديابه
حكومتك يا ريس حكومة فساد
فسادها يا ريس مغطى البلاد
شبابنا يا ريس قاعد ع القهاوى
و عمال يا ريس بتطلب رشاوى
زراعه مافيشى صناعه مافيشى
و تعليم مافيشى و صحه مافيشى
و ذل و مهانه ولا فيه مكانه
ضرايب كتيره أجورنا قليله
حياتنا مريره عيشتنا ذليله
زهقنا يا ريس تعبنا خلاص
فارقنا يا ريس بغينا الخلاص

قصة واقعية !

مش عارف المصريين فى الخارج و بالأخص الدول العربيه ليه قلبهم مش على بعض؟
 كل الجاليات تلاقيهم مع بعض و واقفين جمب بعض إلا المصريين و أخص اللى فى الدول العربيه او الخليج بمعنى أصح
على طول مش بيحبوا بعض او دايما تلاقيهم متفرقين كل واحد فيهم فى وادى و مع نفسه و مستعد يدوس على أخوه طالما فيه مصلحه هتعود عليه حتى لو كان ده هيقطع عيش أخوه
أنا شغال فى مجموعة صيدليات فى دوله عربيه و مديرى مصرى و كل الصيادله مصريين مديرى شكله مبسوط بالكرسى و تقريبا الكرسى كبير أوى عليه عشان كده حاسس دايما بعقدة النقص مع إنه صيدلى و المفروض إنه حاسس بينا لكن للأسف كل اللى يهمه الكرسى عشان كده بييجى علينا دايما قدام صاحب العمل و بيقلل المصروفات على حسابنا و حساب تعبنا و جهدنا لدرجة إنه بدأ يفصل ناس و يقطع عيشهم و يرجعهم مصر خروج نهائى و كمان مبسوط و فرحان أوى إنه بيقطع عيشهم و أرزاقهم مش يعرف إنها مش دايمه ليه و إنها لو دامت للى قبله ما كانتش وصلت له المشكله سوء إدارة المكان عاوز تعرف سبب فشل أى مشروع ابحث عن الإداره هتلاقيها السبب 
إداره فاشله قادره على تحطيم أى مشروع و تخريبه
إداره ناجحه تقدر تحول التراب لدهب
مديرى فاااااااااشل بكل المقاييس و بيدارى فشله بفصل الصيادله و العمال و تشويه صورتهم قدام صاحب العمل و صاحب العمل ولا هو هنا و لا دارى بحاجه عايش فى عزله و مش بيشوف و لا بيسمع غير مديرى و بس و سايب الدنيا خربانه و الشغل عك ف عك
مش عارف هاقدر استحمل الوضع ده لحد امتى ؟
بس كل اللى انا واثق منه و متأكد منه إن الوضع ده لايمكن يستمر
إما يكون مصيرى الفصل زى باقى زملائى أو إنى أنزل مصر أجازه بلا عوده و احاول اوفق اوضاعى فى مصر عشان أوفر حياه كريمه ليا و لأسرتى

و غالبا الخيار التانى هو اللى هيحصل و جايز يحصل قريب أوى
كل اللى بتمناه من ربنا انه يقف جمبى و يكون معايا بيرعانى فى كل خطوه بأعملها و الأرزاق بيد الله زى ما بيقولوا 
علمت أن رزقى لن يأخذه غيرى فاطمئن قلبى

لاقيت الفانوس و دعكته طلعلى عفريت !!

لقيت الفانوس مرة ودعكته طلعلى عفريت… شبيك لبيك

قلت أنا للذل باى وودعته وللعفريت هاهريك هاهريك

قالى هأوأو يا إبن الإنسان دانا عفريت مارد بن جان

ما يهمني مكان ولا زمان واطلب وأنا عندى البرهان

*****************

أناعاوز قمح زُرع فى مصر ومرتب يكفى لآخر الشهر

وحكومة متعصرنيش عصر ومسؤولين يبطلوا فشر

وعاوز عيش من غير طوابير وإنفاق حكومى بدون تبذير

وانتخابات من غير تزوير ورئيس سابق أشوفه كتير

*****************

عاوز فى بيتى شيكارة دقيق وتبرير مقنع لأى حريق

ومجلس شعب بدون تصفيق وفى كأس العالم لينا فريق

وأكلة كباب مشوى على السيخ مع عيالى فى شرم الشيخ

وأشرب فى القسم عصير بطيخ وأخرج سليم بدون تلطيخ

ونفسى الضحكة ترجع تانى ورصيف للمشى أنا وخلاّنى

وجنيه مصرى زى البرانى يشترى حتة لحمة ضانى

*****************

رد العفريت عليا بغشم وقال يا مصرى ماكنش العشم

بص.. أنا ممكن أشيل الهرم واسدلك الأوزون اللى اتخرم

وأرجعلك الأكل اللى اتهضم وتمأمأ البقرة كأنها غنم

أبنيلك قصر من العدم وأقولك معنى شرم برم

بس طلباتك طلبات ملموس عقله خلاص أكله السوس

ده تخطيط يا بنى ومدروس إنك تعيش على طول موكوس

وأحنا بناخد منكوا دروس إزاى يبقى الجن متعوس

ويا ريت ترجعنى تانى الفانوس وأنا راضى أعيش محبوس

بدل ما أخرج واتبهدل زيك ويتلم موكوس على متعوس

خاطره ..1

أرض النفاق - حكاية الشنكل

مشهد كوميدى يعكس واقع الروتين فى مصر 


 

بلدنا كده و كده !

ليه كل حاجه فيكى يا مصر كده و كده ؟

ديمقراطيه كده و كده !

مؤسسات ( مجلس شعب و مجلس شورى و قوانين و حكومه ) كده و كده !  

إنتخابات كده و كده !

كل حاجه فيكى ديكووووور - مناااااظر و بس


لكن الجوهر غير كده خااااالص


ترزية القوانين و الفاسدين و أصحاب المصالح بيقدروا بقدرة قادر 


يغيروا المضمون و الجوهر و بيكون المظهر زى الفل


المشكلة مشكلة حاكم و محكوم 


حاكم إما إنه بيعرف البلد عن طريق التقارير الكاذبه و الخادعه اللى بتوصله من المنافقين و أصحاب المصالح و دى تبقى مصيبه
أو إنه متابع و عارف و ساكت و دى تبقى مصيبه أكبر


و محكوم مضحوك عليه و راضى بقليله و شايف السرقه و النهب و الفساد و مغمض عينيه او مطنش و سااااااكت


المعادله صعبه أوى و مش عارف إزاى تتحل ؟


عشان تتحل لازم الشعب يتغير ( ثقافته و أولوياته و إهتماماته و سلوكه )
كمان الحاكم لازم يتغير ( لا أقصد الشخص ) و لكن السلوك و النظره إلى البلد و أحوالها و طريقة إدارتها و العبور بها من حالة الفساد و التخلف إلى الطريق الصحيح


يا ترى ده ممكن يتحقق ؟


و لو ممكن يبقى بعد أد إيه ؟؟

كلام من القلب

عملت المدونه دى بعنوان فضفضه مصريه 

المدونه مش ليها اتجاه محدد او مواضيع محدده

الغرض منها إنى أفضفض فى كل ما يدور فى ذهنى تجاه بلدى 

يعنى هاتكلم فى كل حاجه و ف أى حاجه و فى أى وقت

جايز لما أفضفض و أخرج اللى جوايا أرتاح

 و جايز كمان أكتشف حاجات أنا مش واخد بالى منها قبل كده

عموما أنا إهتماماتى كتيره و مش محدده يعنى ممكن سياسه على شوية كوميديا على شوية شعر او خواطر او أى حاجه أحب أدونها 

الحاجه الوحيده المشتركه اللى هتكون فى مدونتى و أحاول أراعيها هى وجود مصر فى كل الموضوعات و ممكن يكون وجودها بصور مختلفه ف كل مره